Single Page Application-ների մի խնդրի մասին՝ Buy.am-ի օրինակով

Այսօր Buy.am-ի կայքի օրինակով ուզում եմ խոսել մի UX-ական նրբին դետալի մասին, որն իրականում էդքան էլ նրբին չի ու կոմպը հաճախ գործածող մարդիկ կարծում եմ շատ են տանջվում սրա ձեռքից։ Խոսքը հղումների, կամ ավելի ճիշտ պետք եղած տեղերում դրանց բացակայության մասին ա։ Որպես փոքրիկ նախաբան ասեմ, որ գործի տեղն, օրինակ, լանչի ժամին շատ էինք խմբովին պատվերներ անում Buy.am-ից, որի ժամանակ հարկավոր էր պատվերը համակարգող մարդուն ուղարկել ուզածդ ուտեստի լինկը։

Buy.am-ի ներկայիս կայքում հղումներն իրականում կան. ապրանքի վերնագիրը սովորական հղում է, որը սեղմելուց էջը փոխելու կամ նոր էջ բացելու փոխարեն ուղղակի pop-up-ով ապրանքի նկարագրությունն է բացում։ Ավելին, pop-up-ի բացվելուց հետո էջի հասցեն էլ ա վերևում փոխվում, որը թույլ ա տալիս էջը թարմացնելուց ընկնել նույն pop-up-ը, կամ էլ հենց էդ հասցեն օգտագործել ուրիշներին ուղարկելու համար։ Քանի դեռ այսքան բանն արած էր, ես առարկելու բան չունեի, թեպետ ավելի կնախընտրեի ⌘-ով սեղմումը ինձ սովորական բրաուզերական ձևով նոր էջ տաներ, քան pop-up բացեր, որպեսզի ստիպված չլինեի աջ սեղմում, Open Link in New Tab անել ամեն անգամ։

Հիմա անցնենք նոր կայքին, որը բարեբախտաբար դեռ beta-ում է ու գուցե դեռ փոփոխվի։ Նախևառաջ պետք է նկատել, որ նոր կայքը մեծ հաշվով single page application ա, ու թերևս դրանից ա ծագում իմ ներկայացնելիք խնդիրը. SPA-ներն ընդհանրապես մի քիչ ավելի շատ ուշադրություն են պահանջում բրաուզերի սովորական աշխատելաոճը նմանակելու հարցում, ու այդ ուշադրությունը կարծես թե (առնվազն դեռևս) չի դարձվել Buy.am-ի նոր կայքում (չնայած, ինչպես վերևի պարբերության մեջ նշեցի, հին կայքն էլ SPA-ական տարրեր ուներ, բայց քիչ թե շատ պատվով լուծել էր դրանք)։ Գլխավոր էջ մտնելուն պես ներկայացվում են և՛ ռեստորաններ, և՛ ապրանքներ։ Ռեստորան ընտրելուց ռեստորանի էջն է բացվում (առանց էջի իրական թարմացման, բայց URL-ը փոխելով), իսկ ապրանքներին սեղմելուց կրկին pop-up-ով բացվում է ապրանքի նկարագրությունը, բայց, ի տարբերություն նախկին կայքի, հիմա ապրանքի ոչ մի մաս հղում չի. ապրանքի անունը էլի հղման տնազ է (մկնիկը վրան պահելուց ընդգծումով ևն), բայց հղում չի, ու որքան էլ փորձեցի նոր կայքով որևէ ապրանքի առանձին հղում ստանալ, չկարողացա, քանի որ հիմա նույնիսկ pop-up բացվելու ժամանակ URL-ը բոլորովին չի փոխվում։ Սրան ի հակառակ, հաճելիորեն զարմացա բետա կայքի «Ռեստորաններ» բաժնից, որտեղ, չնայած էլի SPA-ական էջ լինելուն, ոչ միայն ռեստորաններն իրական հղումներ էին, այլև հարգվում էր ⌘-ով սեղմումս ու ռեստորանը նոր էջով էր բացվում։ Հաստատ չգիտեմ՝ որն ա էս տարբերության պատճառը, մտածում եմ՝ ստեղ framework-ի ներկառուցված directive-ներից են գործածել, որն էդ ամենը հոգում ա։ Համենայնդեպս, փաստն այն է, որ այս շատ ցանկալի տրամաբանությունը լիովին բացակայում է ռեստորանների համար՝ գլխավոր էջում, և ապրանքների համար՝ կարծես թե ամբողջ կայքում։

Հ.Գ. սա կարդալուց գուցե Ձեզ մոտ առաջանա շատ արդար մի հարց, թե ինչու եմ ես բլոգումս մեծ-մեծ բրդում՝ փոխարենը այս ամենը մի կառուցողական նամակով կայքատերերին հայտնելու։ Առաջ շատ էի իրականում հայկական ընկերություններին նմանատիպ, հաճախ՝ լավ երկարաշունչ, նամակներ գրում ու մանրամասն ներկայացնում իրենց խնդիրները։ Մի մասը բավավարվում էր պարզապես մի կիսապատրաստի նամակ հետ ուղարկելով, իսկ մյուս մասը բոլորովին չէր էլ պատասխանում, ապա մի քանի ամսից ներկայացնում էր իրենց սուպպեռ-նորարական, ավտոմատացված (իմա՝ ետնաբեմում լրիվ մեխանիկական աշխատանքով կատարվող) պրոդուկտը։ Այդ պատճառով ես ճիշտն ասած շատ եմ ափսոսում իմ նախկին, ներկա և ապառնի բոլոր ջանքերը հայկական բիզնեսներին որևէ հետադարձ կարծիք տալու գործում, և խնդիրներ ծագելուց, եթե դրանք շատ ուղղակիորեն ինձ չեն վնասում, բավարարվում եմ բեսթիներիս բողոքվելով և մեկ-մեկ սենց գրառումներ անելով ։դ